DEPARTMENT OF AGRICULTURE Bicol Region
Typhoon Urduja Advisory

Nin huli sa papaabot na Bagyong Urduja na pwedeng maglandfall sa Eastern Samar sa Byernes na aga, December 15, an Departamento kan Agrikultura igdi sa Bicol, nagpapa-abiso sa satuyang mga parauma na maghanda asin magpasiguro nin huli ta magdadara ini ning mahiwas na pag-uran sa mga probinsya nin Camarines Sur, Albay, Catanduanes, Sorsogon asin Masbate sa rehiyong Bicol.

Ipapasubli kan DA an duwang combine harvester/thresher kan opisina rehiyonal sa San Agustin, Pili sa mga interesadong parauma para anihon mga paroy na pwede nang anihon para maisalbar sa duros o sa baha. Apuwera sa duwang unit na nasa DA regional office igwa man nin mga combine harvester sa mga Research Outreach Stations kan DA sa Asid, Masbate City; Calasgasan, Daet, Camarines Norte; Cabid-an, Sorsogon City; asin Camalig, Albay na pig-abisuhan na sublion kan DA para magamit sa pag-ani kan mga pwede nang anihon. An DA an ma-asumir ngona kan konsumo sa krudo kan mga nasambit na combine harvester asin babayadan ini kan parauma pakatapos mag-ani.

 

Para duman sa mga nakaani na, idiretso na paalangon an mga paroy sa mga flatbed dryers na nakabariwas sa mga kooperatiba, asosasyon asin LGUs sa dakul na lugar sa rehiyon Bikol.

Para dai mabasa ang mga naka-stock na paroy, abono asin banhi tahuban ini kan laminated sacks.
Duman sa mga lugar na binabaha darahon an mga ataman na hayop sa halangkaw na lugar o sa mga pig-disignar na evacuation center para sa mga hayop. Mag-pasiguro nin pambahog para sa hayop o kaya gibohon an cut and carry para makasigurong igwang pambahog sa mga ataman na hayop.
Gibohon an pruning kan mga kahoy para maibitaran an pagkatumba o pagkaputol kan mga sanga.
Kun dai maibitaran na tamaan kita kan bagyo, an DA pirming igwang handang mga pantanom o banhi para sa rehabilitasyon.
Maghanda, magpasiguro, mag-arang po kita asin magpangadye na maglihis an bagyo sa satuyang rehiyon. Diyos Mabalos!