CADLAN, PILI, CAMARINES SUR – Sa muling pagbisita ni Agriculture Secretary Francisco Tiu Laurel Jr. sa Bicol, 985 na magsasaka ang nabigyan ng mga ayuda at modernong makinaryang pangsaka.

Umabot sa 627 magsasaka ng palay na rehistrado sa Registry System for Basic Sectors in Agriculture (RSBSA) ang nakatanggap ng Rice Farmers Financial Assistance (RFFA) na may kabuuang halagang P4.38M. Sa ilalim ng programang RFFA, ang bawat kuwalipikadong magsasaka ay tumanggap ng P7,000 tulong pinansyal na maaari nilang magamit sa pagpapaunlad ng kanilang lupang sakahan.

Tatlong asosasyon naman na may kabuuang 203 myembro ang tumanggap ng mga makinaryang pangsaka mula sa DA Bicol Corn program tulad ng combine harvester para sa Sto. Niño Ocampo Farmers Association ng Ocampo, Camarines Sur, four-wheel drive tractor para sa Bigaas Corn Cluster Association ng Calabanga, Camarines Sur, at forage chopper para sa Kilomaon Integrated Farmers Association ng Sagñay, Camarines Sur.

Nabigyan naman ng dalawang four-wheel drive tractors ang Provincial Local Government Unit ng Camarines Sur habang ang San Antonio Cagbunga Agriculture Cooperative (SACAGCO), Catanusan Farmer Agriculture Cooperative (CFAC), at San Roque Danawan Farmers Association (SARDAFA) ay tumanggap din ng rice combine harvester at four-wheel drive tractor mula sa Philippine Center for Postharvest Development and Mechanization (PhilMech). Makikinabang sa mga bagong makinarya ang 122 miyembro ng tatlong kooperatiba at iba pang mga magsasaka sa buong lalawigan.

Iginawad din ni Secretary Tiu Laurel ang tsekeng nagkakahalaga ng P300,000 para sa tatlong ektaryang High-Yielding Variety Nursery Rapid Propagation Project ng Sugar Regulatory Administration. Mabebenepisyuhan nito ang 33 miyembro ng Sto. Niño Small Farmers Association (SNSFA) sa Pili, Camarines Sur.

Ulat ni: Annielyn L. Baleza, RAFIS 5
Kuhang larawan ni: Zandra G. Abogado, RAFIS 5