Nin huli sa papaabot na Bagyong “ODETTE”, na pwedeng magpakusog kan nagpapadagos na La Niña asin magkawsa nin mahiwas na pag-uran, pagbaha asin landslide sa December 16, 2021, an Departamento kan Agrikultura igdi sa Bicol, nagpapa-abiso sa satuyang mga parauma na maghanda.
Kung ang paroy 85% nang hinog, pwede na ining anihon.
Ipapasubli kan DA an duwang combine harvester/thresher kan opisina rehiyonal sa San Agustin, Pili sa mga interesadong parauma para anihon mga paroy na pwede nang anihon para maisalbar sa duros o sa baha. Apuwera sa duwang unit na nasa DA regional office igwa man nin mga combine harvester sa mga Research Outreach Stations kan DA sa Asid, Masbate City; Calasgasan, Daet, Camarines Norte; Cabid-an, Sorsogon City; asin Camalig, Albay na pig-abisuhan na ipapasobli kan DA para magamit sa pag-ani kan mga pwede nang anihon. An DA an ma-asumir ngona kan konsumo sa krudo kan mga nasambit na combine harvester asin babayadan ini kan parauma pakatapos mag-ani.
Para duman sa mga nakaani na, diretso nang paalangon an mga paroy sa mga flatbed dryers na nakabariwas sa mga kooperatiba, asosasyon asin LGUs sa dakul na lugar sa rehiyon Bikol.
Aramon kung sain ang pinaka-haraning Rice Processing Center sa saindong lugar na pwedeng pagdarahan kan paroy.
Para dai mabasa o madumog an mga naka-stock na paroy, abono asin banhi tahuban ini kan laminated sacks.
Duman sa mga lugar na binabaha darahon an mga ataman na hayop sa halangkaw na lugar o sa mga pig-disignar na evacuation center para sa mga hayop. Mag-pasiguro nin pambahog para sa hayop o kaya gibohon an cut and carry para makasigurong igwang pambahog sa mga ataman na hayop.
Gibohon an pruning kan mga kahoy para maibitaran an pagkatumba o pagkaputol kan mga sanga.
Pirming mag-antabay sa radio asin sa Weather broadcast hali sa DOST PAGASA asin sa Department of Agriculture
Kun dai maibitaran na tamaan kita kan bagyo, an DA pirming igwang handang mga pantanom o banhi para sa rehabilitasyon.
Kung nakapagpa-rehistro kamo kan saindong paroy o mais, makaka-resibe kamo ning crop insurance kung madanyos kan bagyo ang saindong panananom. Kaya marhay na bago magtanom, iparehistro ini sa Phil. Crops Insurance Corporation o PCIC.
Maghanda, magpasiguro, mag-arang po kita asin magpangadye na maglihis an bagyo sa satuyang rehiyon. Diyos Mabalos!
RODEL P. TORNILLA
Regional Executive Director
